PARANG SABBIL SIN KAMI

1.
Bismillah in tagnaan, sumunud in pagsalam
maunu-unu na kamu yan? manga kakasi ha tiranan
yari ku na balikan in tarasul piyag-anaran
hal sin kita katan, parang sabbil sin bata' huling jaman.

2.
yari aku simindil in baran piyahadir
bisan maniyu'-tiyu' dimihil, sin luun atay pamikil,
ha tungud sin pagparrang sabbil, mangatu ha kafir
bisan bukun magandil, tattap magad tumapil.

3.
mahuli in kami katan ha kalayuan
nagbubuluk binsana', nagtutuyu' in baran
amun halawm atay iban pikilan
magjihad ha kabuhi' tungud pa karayawan.

4.
bukun kami isugan, bukun gagandilan
bukun kami bubunuh, bukun pagka'usugan
kami na ini in tumpukan sin naglalawag kabuhi'anan
nagpa-parang sabbil maglawag napaka pa familya kalasahan.

5.
sakbasa in baran niyu agun way na halihan
dum adlaw nagtutuyu' ha paghinangan
bukun in niyat ha atay bat subay magkadayahan
in maksud lumawag alta' pa maas tumabang.

6.
Inah, Amah, Kakah, Utoh iban na hi Indah
tatasan niyu in haggut pasu' ha dugaing Hula'
tahanan niyu in hunit iban binsana'
bang mayan in sila masanyang, in kamu lilla'..

7.
in kamu ha tulakan bukun masanyang
in kamu ha kalayuan bukun kiyukuyagan
bang dumatung na in tumtum iban lindu randam
saksi sin tubig mata in basa' sin luha' ha u'an.

8.
in kamu timutulak in atay sipak
bukun kamu masanyang maglawag pilak
awn waktu bang tumumtum sa' hisilawak
in kasigpitan niyu lamud na ha pagjihad!

9.
in kamu nagjijihad pa hikarayaw
bisan unu in buga', bisan hiyahanggaw
tiyahunan in lugay ha pagpanaw-panaw
maglawag napaka kabuhi' dum atawa adlaw.

10.
mahunit sa in maghinang sin parang sabbil
bukun naman subay magbunuh umatu ha kafir
bisan in magparayaw sin kabuhi' ta iban pamikil
mabista na nagjihad pa hikarayaw in pantun dalil.

11.
in pagparang sabbil ku tungud pa Lupahsug
amuna in magpahambuuk sin Bangsa Tausug
magsulat ha tiranan sin kahalan pagbaugbug
kalu ra man in jihad ku ini sumampay in maksud.

12.
bukun aku isugan, in sanjata ku magsulat
bukun aku pandikal, in hinang ku magpasaplag
bukun aku mapanday, in hipasampay ku amanat
pa katan sin Bangsa Tausug_AYAW KITANIYU MAPULAK KANAT!

13.
in kitaniyu magparang sabbil pa kaniya pa kaniya
in kitaniyu magjihad magsama-sama
bisan dugaing in kakahinang iban lafal bissara
magtayakkup kitaniyu ha ngan sin Hula', Bangsa iban Agama!

14.
in kitaniyu huling jaman subay maghambuuk
pa hikadayaw sin Hula' iban hikakusug
ayaw kitaniyu malupa ha janji' mahugut
in Lupahsug yaun para ha Bangsa Tausug!

15.
in pagparang sabbil taniyu maraeh dugaing-dugaing
awn magdah titimbakan, awn magpanaug cen,
awn maglawag napaka, awn maglukis ha katas iban pen
sumugawa' subay da in maksud iban niyat ta di' magkahalin!

16.
Lupahsug Hula' ku mataud na dugu'
in limasay ha Lupa' mu daing pa sin jaman hinda Apoh
madjari baha' hiundung namu' na in pagbunuh?
magdawhat siun Kamahardikaan amun hak namu'.

17.
kari na kamu manga kabataan sin huling jaman
magparang sabbil na kitaniyu pa karayawan
duwaahan taniyu in kasajahetraan iban kamardikaan
kalu ra man makbulan na in niyat taniyu sin Tuhan Rahman.

Baktulan: Quya Angel Q0loub (AQ)
Jojo Amani Imamil Sawaban 

TAGNA PA BIHAUN

Assalamo alaikom warahmatulla,
tagnaan lumapal ngan sin ALLAH,
iban mangayoh sohud madto kaniya,
ha uno uno na in nadusa di ha dunya,

ako hambuok miskin timulak daing ha hulah,
Inah Amah taymanghod binin susa dih hikatugilah,
susa atay limandoh iban sin kublah,
naglillah na sadja pa tuhan waydugaing siya
in magbayah,

sulayan ko hilapal iban hikabtang,
in kabuhi sin OFW waysabandang,
timulak pa middle east ihlas sin baran,
hinang ha bay in kitakdil sin tuhan,

kabuhih daing tagnah sambil bihaun,
wairuon sungan tahon pa tahon,
bulan bulan in gadji waymagkatipon,
piyarara pa hulah pa maas taymanghod sabab maulong,

bang in maas taymanghod mag txt na,
pa roaming hi send madto kaniya,
cp kitaun bang uno in bissara,
waydugaing amura money mangayoh magpara,

bang dumatong in susa magkarukkaan,
luhah mata tomuh dih kananaman,
in daghal sah sin lima dupunan,
iban sanglit yaa ALLAH ikaw in tagkabayaan,

bang dumatong na ha middle east in panghahaggot,
baran namimidpid maghinang iban panyabot,
hinang taluson katan waypagsumlot,
sabab amo in kiyari limag usaha in diyahot,

bang dumatong na in wakto mapasoh,
hulas dih hikasipat tuh manuh,
baran malinik na sin hulas nagtitinoh,
basah in baran katan sambil in badjoh,

haggot iban sin pasoh in siyandalan,
daakon madto mari sin aamo hinang katan,
in ginhawa baran makaulong laul laulan,
sah na sadja manyabot yaa ALLAH dihili ako kusog iban eman,

labi na hangpo tahun ha abroad naghinang,
hambuok aamo ra waynakapinda pa kaibanan,
misan in gadji tihtiyoh da pagsungan,
waina nagpikil basta ha pagkaun dih pagbistahan,

in maas taymanghod waynatungbasan,
pa hambuok anak nila limayoh hulaan,
ummol batah bahgo pa sin liyabayan,
ha bihaun mayoh na in liyaasan,

sambil pa bihayaun in siya yari pa,
ha aamo nag hihinang nagbubunok binasa,
in pagpara cen money pa hulah masimasi ra,
ha bangman maka tulong pa maas taymanghod karna sin ALLAH,,

di na in tarasul ko manubtuban,
hipasampay pa OFW katan,
bang bukon marayaw in ka kabbtang,
kamo na katan in magpa hantang,,,


https://www.facebook.com/jema.abdullah2

MUSLIMAH

In lingkat mu ha pangatud sin mnga mata,
Labih na ha ngpa-panjari in ALLAH,
Subay mu tuud ayaran in ginhawa,
Babae kaw sapantun palmata,
Ha pangatud sin sila in ikaw mahalga.

Ginhawa baran subay tud ayaran,
Parayawun in pangaddatan,
In maw- maas mu subay pg-taatan,
Ayaw kaw sumulang ha himumungan,
Ginhawa baran ayaw patamakan.

Muslimah kaw duguh sin Tausug,
Panubuh sin mnga gagandilan sin Lupahsug,
Tantuh misan kaw babae in ikaw maisug,
Iya-angan angan sin mga sila madurug,
In sila kaymu landuh maibug.

Ayaw mu tuud kalupahi,
In ikaw hambuuk gagandilan babae,
Ayaw kumahagad ha fitnah di manjari,
Ginhawa baran ayaw mgkadtu mari,
Layuan in mnga hinang mg-ikuh iban jangkih.

Pa tuhan pg-taat kaw,
Hinangah in hikarayaw,
Halli'i in masasat kaw,
Ha dunya ini malawung kaw,
Pangadji kaw, iban pg-guru kaw.

Muslimah kaw gagandilan,
Mag uttara sadlupan,
Maglibut sin hulaan,
In lingkat mu wayi sibu-an,
Labih na in dayaw sin pangaddatan.

                                             

DAYANG DAYANG OF LUPAHSUG

"Dedicated to the BFF Hearty Angelz and to all Muslimah of Tausug around the Globe"

Lupahsug iban Amah ku

Pikilan ko nanalih, natum-tum hangkarayi,
Simaygpat pa pangatayan ku marayi',
Ha waktu ku pa duun sibih-sibih,
Bang ku tumtumun kulang tud in talih,
Kahalan sin hula wala tud nahati.

Limagku aku malayuh daying ha hula kyapag-asagan duguh,
Masannang matuud in parasahan,
Pagka baha anak kamagulangan,
Maas ku marayaw in pg-usaha katan,
Wala ku sila kita' ha lawum kasigpitan.

Mayta baha in amah ku,
Daing katagna yadtu,
Daran pagkakitaan ku,
Magtangis ha dugu-ruguh,
Satiyap tahun bya na saja hadtu.

Mabugah aku umasubuh,sah di katahanan,
Hambuuk waktu ,isugan sin baran,
Nangasubuh ha amah ku kalasahan,
Mayta kaw yan magtangis daran,
Ha lawum hangka-tahun maka-minsan.

Anak amuyan in hangkan,
Lupahsug agun mahunit ku balikan,
Maas taymanghud ku nasabil katan,
Sin pg-sud sin tyanggeh wala ku nahimangkan,
Anak asawa ku iban in kyabimbangan.

Ha waktu sin pg-bunuh yadtu
Amah ku ha tulakan sah'bu,
Pagka in siya hambuuk sundalu
Kya-orderan mg-escort madtu,
Pa malakanyang awun mg-surrender mnga tau.

Pag-ingat sin amah ku,lupahsug nahilu na,
Simukat kan Marcos in sya subay muwi na,
Anak-asawa di na kaingatan bang hauno na,
Lawlasya katan pulak kanat na,
Bimbang sin pangatayan limanduh na.

Private jet in siya pyahatud,
Pagdumul pa baba pg-atud,
Lupahsug hiluwala narahpug,
In tembak madtu mari kikita',dyurungug,
Hi Amah ku daing ha taas jet ha lubid nanaug.

Sukud kahpatan tag-upat way nalapay sin mnga timbak,
In ha lawum pangatayan, janji in siya dimagpak,
Lawagun in asawa iban mnga anak,
Tapus dan dyurungug maas bata mag-silawak,
Ha pag-alupan in kaibanan pamanga hantak.

Mahunit nya tud kalupahan,
Katihabaan sin dan pyanawan,
Mnga patay mujahideen  pyaglabayan,
Hyapit pa pyamariksaan,
Lahasiya nya in kaibanan,
Napunud in ginhawa timangis in baran.

Ummul ku sumud upat tahun,
Kulang pa in panumtum,
Wayi tud panayuh ku pa ruun,
Bang unu in mnga kahalan dimatung,
Hangkan in Lupahsug makaulung.

Pag-puas sin bunuh,
Amah ku ngpa-assigned pa malayuh
Didtu na kami limagguh,
Wayi mgsabbut sin halan pg-bunuh,
Halan sin Lupahsug tyapuk kamuh,
Tuput ha pangatayan hi Amah malagguh,
Hangkan satiyap tahun in luha nya tumuh'.

Bihaun in kissah ini,
Pa mnga anak ku kya-story,
Misan in Lupahsug malayuh mari,
Mabayah aku in panubuh ku makahati,
Hula Lupasug in sila subay kumasih.

Bang man isab dihilan pa lidjiki sin ALLAH,
Amah iban Inah ku in ummul pa habaun pa,
Makapagkita iban sin mnga apuh nila,
Misan kami yari ha malawak kanila,
Anak-apuh nila makasi malasa.

LUPAHSUG MASIH KIYATUMTUMAN

Assalamualaykum himiklad tarasul iban daman,
Pasal sin hulah asal daing ha siganggang,
Nag alup iban siasi higad kabuhanginan,
Minsan poh malingkat in kahantang.

siganggang beach ha pandamih,
In higad malanuh wayi lummih,
Minsan hulah biyah sibih-sibih,
 In lingkat niya wayruun salih...

Wayi salih sibuh sinlingkat,
Masuuk siya pa school Lapak,
School hambilan in hansipak,
School fisheries in pa taas..

Pag ka na-awun na in pag kaluh,
Sambil in School piyag luboh,
In manga bata School nahiluh,
Sambil pa security nangatuh,

Pagka sin natutup na in pag School,
Pa Central Sulu College aku naginroll,
In pikilan ku biyah bukun da hatul,
Wayih aku nabiaksa ha daira maglunsul.

Pagka in School nag tutup nah,
Sin tahun kawaluan tagduwa,
Nag School aku wayina,
Saltah timulak aku pa Sabah.

Liyugayan aku duwatahun ha tulakan,
Nag balik aku nag School pa Zamboangan,
Nag hulah aku ha sapang palay baliwasan,
Wayi ruun family atawa kakampungan...

Limatahun nag hulah ha zamboangan,
Sambil nakabaak na bagay tunang,
Wayi ku in kakasi ku hiyundungan,
Sahingga na asawa ku hi Fetrina in ngan.

Nagtiyaun kami sin june 1, 1989,
In pikilan ku sapantun kahuy timulin
,Diya ku siya pasabah timulak nag bing,
In maumaas katan kakampungan nakabin.

Hawaktuh kamih karuwa timulak,
Daing ha LUPAHSUG kamih nakalawak,
Hulah kalasahan hibin bukun in niyat,
Lumawag usaha' magbalik da sumapat.

Pagka kami karuwa hatulakan,
Nakabaak nah tubuh ha panawan,
Anak asawa mahunit na lawakan,
Ha sabah naghulah biyah timanam.

Naghulah kamih ha Sabah duwa'tahun,
Nakalaus na kami karuwa pa semananjung,
In kamih karuwa' nag lalasa nag iisun-isun,
Daing ha unu-uno katan haggut pasuh dumatong.

Iyabut na kami pituh anak 'cahaya mata',
In kami karuwa nag kakasih nag lalasa,
Timuyuh aku limawag kabuhianan imusaha,
In asawa ku ha bay ha mnga anak nag jajaga.

Ha melaka kami nakabutang bihayaun,
Manga anak katan pa iskulun patuyuun,
Kasih lasa namuh karuwa mag duruhun,
Subul bujjang na in anak namuh bihayaun.

Magsukul tuud kamih ha LUPAHSUG tiranan,
Na'paaun ha FB. hambuuk tumpukan,
Daing ha bagay iban manga kakampungan,
ILL nahinang hambuuk na pg-titipun tipunan.

Mamaid na aku kaniyu katan,
Mayuh masuuk dih ha tiranan,
Bang aun time timibaw dakuman
Salam dua' kaniyu katan wassalam....

credit: James Abdullah:fb 

ANAK KO MAGULANG

Awun In Hambuuk Daman Ampa Kissah
Story Lyabayaan Sin Waktu Masa
Hambuuk Babae Nkapg-Hula 
Ha Ummul Nya Awal Pa
Nasaut Sin Suratan Buhih Sah

Pila Bulan Lyabayan
Hi Indah Syangan Na Bulan
Ng-Hihimumungan In Katan
In Xia Yn Maray Na Nangiram
Awun Na Nyawa Ha Laum Tiyan

Pgka In Xia Sumud Na Lima Bulan
Pg-Pangiram Dimah Sakit Ha Baran
Y Hali Ha Pg-Ospitalan
Sambil Na Nangayugan
In Banah Ha Laum Na Sja Karukkaan

Ha Hospital In Xia Na-Admit
Doctor Madtu Mari Na In Pg-Check
In Agih Sin Doctor Hi Indah Malawum In Sakit
In Banah Agun Dyagpakan Sin Lupa Iban Langit

In Kadoctoran Dimihil Decision
Subay Emergency Operation
Lapay Na In Bata Subay Abortion
Karna Sin Sakit Iban Ubat In Xia Ma-Poison
In Banah Na-Ngagad Ha Decision
Bng Man Asawa Nya Buhiun
In Sakit Igan Palayuun

Hi Indah Timangis Iban Pgsuwara
In Tuhan ALLAH Sangat Kawasa
In Unu-Unu Katan Hi-Uwi Madtu Knya
Buat Malaingkan Igun In Bata Di Xia
Karna Anak Ha Laum Tiyan Makasi-Malasa

In Mnga Doctor Ng-Hihimungan
In Bata Y Na Kagunahan
Bng Xia Maubus Na Operahan
Tantu In Bata Kasatsatan
Hngkan Tud Subay Igan
Bng Bukun Sat-Sat Anggawta Iban Pikilan
(Physical N Mental Abnormality),

Alhamdullilah anakku magulang bihaun Nurse na.

KISSA KASUNUG SIN TIYANGGI LUPAH SUG FEB. 07, 1974

Bismillah

Kimugdan bulan Febraury 07, 1974
Nabuklad in katan sin taynga’ bukul
Mga mahadjana’ ha tiyanggi nahiyul
In pikilan landu susa sabab nabutul
Mga MNLF nakanat nanggiyul-giyul
1
Katan sin MNLF ha gimba’ nag tayakkup
Amura walah naka saddia in daing ha luuk
Subay na sung tumagna malaum kup
Ampa in kaibanan nakaingat mahup
Hangkanna in nahinang nila maitung luruk
2
In MNLF nakasud pa tiyanggi nag babaan
Ha Masjid tulay na natipun in katauran
Dugaing in daing ha uttara iban satan sadlupan
Misan iyanun in pasisil tiyanggi kiya pag tupuran
Saddia in baran tulus ikhlas misan unu in kumugdan
3
Amurasa in nalipas wala' nila kiya jagahan
In dampal pa Lambayung kiya lupahan
Amuna in nahinang sin mga Army dan
Daing ha Muhbo' in hinang piyag panaugan
Nag dul baya' sabab sin wayruun kabugaan
4
In katan sin MNLF halaum tiyanggi nag tatanam
Daing sin kup pa sampa kiya laum duman
Awun sinyas mauin piyag hatihan sin katan
Maabut lisag duwa awun hambuuk tibak kadungugan
Amuna yadtu in mahinang bunu ha panag naan
5
In tau ha lawum tiyanggi katan sin naka ingat
Wayruun na pag tug amupaka haluk misan in lipat
Tiyainghugan na’abut lisag duwa awun hambuuk timbak
Amuna in siyunuran sin katan katingug nangularak
Malugay napugna' agad di' mag hungka di’ hika sipat
6
Timagna’ in bunu sin lisag duwa lapit adlaw
In mga manusiya’ ha tiyanggi nag sambigaw
Katan sin nakasakap miyaguy na iminut miyanaw
Amuin in pag iyanun misan panyap way naka agaw
Unu’unu na sadja in kiya sakapan nila nagawgaw
7
In paguy sin manusiya’ buku’ sakad landu’ in taud
Awun in pa gimba awun da isab harap palaud
In kiya hulugan sin canyon nag mula landu in taud
Damikkian in ha laud amura sabab awun nag ka lu’nud
Mataud in nag kabutas mag tali’anak mag taymanghud
8
Timagna’ in bunu sin lapit adlaw jukup lisag duwa
Pangatayan sin manusiya’ maka ulung hasnsul binasa
In Paguy madtu mari luwal da pamutus in diya’ra
Yaunna in hara pa laud pa kapuan iban pa gimba
Timuklas daing ha pamaybay nila wayruun pabyap nara
9
Naabut bulat mahinaat Helicopter piyalupad nag lumba’lumba
Wayna nag tilik timbak na sin sundalu madtu mari way bidda’
Didtu na mataud nag mula civilian daing ha maas pa bata’bata
In nahinang sin mga tau katan biyaus timbak daing ha baba’
Kiya hulugan hambuuk masuuk pa landing mataud in naka kita'
10
In paguy sin manusiya’ awun in pa satan awun in subangan
Amuin in pag iyanun maka ulung in mga anakan katan
Nag u’urul urul harap pa gimba natutundan tundan
In mga bata’bata sa’ sin siyagit makahansul pangatayan
Sabab nag lamud na in laul, uhaw iban hapdi’hapdian
11
Maka hansul sa pangatayan mga tayamanghud bang ta tumtumun
Sabab mga manusiya’ paguy pa satan labay daing ha Tanjung
Mataud pa in nag mula nasabil sabab sin piya urul ha canyon
Tanda’ tuud sin mga satru’ misan pa civilian dida’ pag piun
Sabab in maksud nila in katan bangsa Tausug asal ubusun
12
Magam gam in mga paguy pa laud iban paka puan
Sabab amura in uhaw iban hapdi’ in tiyang kaan
Halaum pila adlaw daing ba Bangas iban Panggasinan
Awun na Lancha naka agad in katauran harap pa Zamboangan
Misan iyanun wayruun nag mula lappas sila katan
13
In nabinsana' tuud amuin mga paguy pa kagimbahan
Misan iyanun nag lamugay iban punglu’ canyon di’ ka’abalan
Mataud tuud daing kanila in nag mula kiya manitan
Kiyarulan in mga satru ha bangsa tausug nang hinang hinang
Sabab pikil nila wayruun da kampong nila nakalmud ha civilian
14
Hibalik ku in kissa hibintung magbalik harap pa tiyanggi
Limawig in Naval ha tungud lambayung nag panaug Army
Maka ulung’ulung in civilian strapping nila madtu mari
In kiya gumsanan amuna in ha duhul sin Nalsari
Agad kailu in civilian najawjana di’ mag kajawjari
15
Pagga in in mga Army naka dunggu pa higad natipun
Katan sin civilian maas bata siyaggaw piyapagpun
Di’ maambat in manusiya’ ha Hospital Lambayung
Way pagpi’ hisyu sadja in iyabutan maka ulung’ulung
Hinang nila apis pahigad pahigad sila mga army in ha gihtung
16
In mga army way pagpi’ nanaggaw cibilian way ag
Amu in nahinang nila apis sapantun ka’agi piyag ad
Sasakatan harap pa Landing civilian duwan sipak piya’agad
Hasupaya sila di’ matimbak sin MNLF mahinang sabab
Tanda sin mga Army ha MNLF landu diyadahit diyadamag
17
In manusitya' ha waktu yadtu landu maka ulung' ulung
Mataud in nasabil halaum Tiyanggi pa ma gulung
Damikkian in ha paguyan kugdanan sin canyon
Kalian na sadja kailu di'na mara duun na hilubung
In hipag saput unu'ununa sadja awun nayan tadjung
18
Hilin ku in kissa sin waktu masa pa mga MNLF gagandilan
Isug di' hika sipat amuin paga iyanun usug pipisan
In sundalu ha tiyanggi da pa Landing piya maniyuan
Amuin in pag iyanun di' na maambat in namarihang
Way hali sin Plane mag hakut haul iban sin bugtang
19
Ampa in hi Commander Ibba’ iban tindug niya
Asal awal pa amuna in naka una nag mula
Panaw nila ludlud daing ha umbul duwa
Kiya dahlasan mataud in nasabil daing kanila
Duun na ha masuuk pa Tigbaw in hiyantakan nila
Bukun army in naka timbak malainkan bangsa ta
20
MNLF daing ha Puti' da sambil ba Talibang
Daing ha Maimbung iban sin daing ha Parang
Hulah Liyubluban Gadja,Talipao, Pantaw iban Palan
Daing ha Luuk iban na sin kaibanan binaybayan
Namaniyu in mga bangsa MNLF gagandilan
Hangkan in mga satru waktu yadtu kiya da'lasan
21
Nag dum nag adlaw in pag bunu' agad way hali
Mga MNLF nag lulunsulan pa halaum Tiyanggi
Awun pa daing kanila in naka pikil simud Ceni
In nahinang nag kalang katan nag lami lami
Sabab sin way kitaun pilikula biya' na sin agi

Mga taymadnghud susula niyuman in kissa ini tagari niyu in part II

credits : abu.ahadani:fb